اسلام آباد پولیس اہلکاروں کو ہفتہ وار چھٹی ملے گی، نئی لیو پالیسی فوری نافذ

اسلام آباد پولیس کے انسپکٹر جنرل نے افسران اور اہلکاروں کے لیے نئی لیو پالیسی کی منظوری دے دی ہے، جس کے تحت چھٹیوں کی منظوری کے اختیارات مختلف سطحوں پر تقسیم کیے گئے ہیں۔ نئی پالیسی کا اطلاق فوری طور پر پولیس کے تمام شعبوں پر ہوگا۔

اتفاقی چھٹی کی منظوری کے اختیارات

نئی پالیسی کے مطابق ایس ایچ او کانسٹیبل سے ہیڈ کانسٹیبل تک تین دن کی اتفاقی چھٹی منظور کر سکے گا، جبکہ ڈی ایس پی کو پانچ دن تک اتفاقی چھٹی منظور کرنے کا اختیار دیا گیا ہے۔

ایس ایس پی کانسٹیبل سے انسپکٹر تک تین دن کی اتفاقی چھٹی منظور کر سکے گا۔ ڈی آئی جی اور ڈی جی کو کانسٹیبل سے انسپکٹر تک تمام رخصتوں کی منظوری کے اختیارات حاصل ہوں گے، جبکہ آئی جی ڈی ایس پی اور ایس پی کی چھٹی منظور کر سکے گا۔

شادی، حج اور عمرہ کے لیے چھٹیاں

پالیسی کے تحت مرد پولیس اہلکاروں کو شادی کے موقع پر 10 دن اور خواتین اہلکاروں کو ایک ماہ کی چھٹی مل سکے گی۔ حج کے لیے 45 دن جبکہ عمرہ اور زیارات کے لیے 21 دن کی رخصت مقرر کی گئی ہے۔

امتحانات اور ہفتہ وار چھٹی

سی ایس ایس اور پی سی ایس امتحانات کے لیے 20 دن جبکہ انٹرویو کے لیے 15 دن کی چھٹی دینے کی منظوری دی گئی ہے۔ پالیسی کے مطابق تمام پولیس افسران اور اہلکاروں کو ہفتے میں ایک دن کی چھٹی ملے گی۔

اتفاقی اور بیرونِ ملک چھٹیوں کی حد

نئی پالیسی کے مطابق ایک وقت میں زیادہ سے زیادہ 10 فیصد اہلکار اتفاقی چھٹی پر جا سکیں گے، جبکہ ایکس پاکستان لیو کے لیے تین فیصد اہلکاروں کی حد مقرر کی گئی ہے۔

دور دراز اضلاع میں تعینات اہلکار 45 دن بعد سات دن اور 90 دن بعد 14 دن کی چھٹی لے سکیں گے۔

چھٹی کی منظوری سے متعلق قواعد

پالیسی میں واضح کیا گیا ہے کہ پولیس قوانین کے تحت چھٹی کو بطور حق طلب نہیں کیا جا سکتا۔ محکمے کی ضرورت کے مطابق چھٹی کی درخواست مسترد یا منظور شدہ چھٹی منسوخ کرنے کا اختیار بھی موجود ہوگا۔