بیلاروس کے اعلیٰ سطحی وفد کی آرمی چیف فیلڈ مارشل عاصم منیر سے ملاقات

بیلاروس کے اعلیٰ سطحی وفد کی فیلڈ مارشل عاصم منیر سے ملاقات، علاقائی سیکیورٹی صورتحال اور پاکستان بیلاروس دفاعی تعاون مزید مضبوط بنانے پر تبادلہ خیال۔

راولپنڈی میں بیلاروس کے اعلیٰ سطحی وفد نے چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر سے جنرل ہیڈ کوارٹرز میں ملاقات کی۔ بیلاروس کے سیکیورٹی کونسل کے اسٹیٹ سیکریٹری لیفٹیننٹ جنرل الیگزینڈر وولفووچ کی قیادت میں وفد نے ملاقات کے دوران مختلف اہم امور پر تبادلہ خیال کیا۔

ملاقات میں خطے اور دنیا میں بدلتی ہوئی سیکیورٹی صورتحال، باہمی دلچسپی کے معاملات اور پاکستان و بیلاروس کے درمیان دفاعی تعاون کے دائرہ کار پر گفتگو ہوئی۔ فیلڈ مارشل سید عاصم منیر نے دونوں ممالک کے درمیان دفاعی اور سیکیورٹی شعبوں میں تعاون کو مزید وسعت دینے کے پاکستان کے عزم کا اظہار کیا۔

بیلاروس کے وفد نے بھی دفاع اور سیکیورٹی کے شعبوں میں دوطرفہ تعاون کو مزید مضبوط بنانے میں دلچسپی کا اظہار کیا۔ وفد کے سربراہ نے علاقائی امن اور استحکام کے فروغ کے لیے پاکستان کے کردار کو سراہا۔