ڈپٹی چیئرمین نیب اور پراسیکیوٹر جنرل کی تعیناتیاں اسلام آباد ہائیکورٹ میں چیلنج

اسلام آباد ہائیکورٹ میں ڈپٹی چیئرمین نیب احتشام قادر اور پراسیکیوٹر جنرل نیب سہیل ناصر کی تعیناتیوں کو چیلنج کر دیا گیا۔ جسٹس عمیر مجید ملک نے ڈاکٹر جی ایم چوہدری کی درخواست پر سماعت کرتے ہوئے نیب، وزارت قانون اور دیگر فریقین کو نوٹس جاری کر کے جواب طلب کر لیا۔

عدالت نے دونوں عہدیداروں کو کام سے روکنے اور ان کی تعیناتیوں کا ریکارڈ طلب کرنے سے متعلق متفرق درخواستوں پر بھی نوٹس جاری کیے۔ درخواست گزار نے دونوں تقرریوں کو غیر قانونی قرار دے کر کالعدم کرنے کی استدعا کی ہے۔

تعیناتیوں میں شفافیت پر سوالات

درخواست گزار کے مطابق دونوں عہدوں پر تعیناتیاں بغیر اشتہار اور شفاف مسابقتی عمل کے کی گئیں۔ درخواست میں مؤقف اختیار کیا گیا کہ نیب آرڈیننس 1999ء کی متعلقہ دفعات 5، 6، 7 اور 8 کے تقاضے پورے نہیں کیے گئے اور تقرریوں میں میرٹ، شفافیت اور گڈ گورننس کے اصولوں کی مبینہ خلاف ورزی ہوئی۔

درخواست میں وفاق، نیب، وزیراعظم آفس، وزارت قانون، اسٹیبلشمنٹ ڈویژن اور ایف آئی اے سمیت دیگر فریقین کو نامزد کیا گیا ہے۔ درخواست گزار نے دونوں تقرریاں کالعدم قرار دینے، سرکاری خزانے سے حاصل کردہ تنخواہیں، الاؤنسز اور دیگر مراعات واپس لینے اور متعلقہ حکام سے تقرریوں کے قانونی جواز کی وضاحت طلب کرنے کی بھی استدعا کی ہے۔

عدالت میں دلچسپ مکالمہ

سماعت کے دوران جسٹس عمیر مجید ملک اور درخواست گزار کے وکیل جی ایم چوہدری کے درمیان مکالمہ ہوا۔ وکیل نے کہا کہ پراسیکیوٹر جنرل نیب سہیل ناصر اپنے نام کے ساتھ سابق جج لکھتے ہیں، حالانکہ وہ لاہور ہائیکورٹ کے ایڈیشنل جج رہے ہیں۔

اس پر جسٹس عمیر مجید ملک نے مسکراتے ہوئے ریمارکس دیے، ’’پھر تو آپ ہمارے بیج بھی اتار دیں، ہم بھی ابھی ایڈیشنل جج ہیں۔‘‘

جسٹس عمیر مجید ملک نے درخواست گزار کے وکیل سے سوال کیا کہ ’’آپ ان تعیناتیوں کی انویسٹی گیشن کروانا چاہتے ہیں؟‘‘ وکیل نے جواب دیا کہ نیب کا پراسیکیوٹر کمرہ عدالت میں موجود ہے اور انہیں نوٹس موصول کروا دیے جائیں۔

اس پر جسٹس عمیر مجید ملک نے کہا کہ نیب کے علاوہ بھی دیگر فریقین ہیں اور انہیں نوٹس جاری کر دیے گئے ہیں۔

اسلام آباد ہائیکورٹ نے نیب، وزارت قانون اور دیگر فریقین کو نوٹس جاری کرتے ہوئے کیس کی سماعت ملتوی کر دی۔