فضل الرحمان سے منسلک مدارس کو سی ڈی اے کے نوٹسز، 15 روز میں خلاف ورزیاں ختم کرنے کی ہدایت

اسلام آباد: کیپیٹل ڈیولپمنٹ اتھارٹی (سی ڈی اے) نے اسلام آباد میں مولانا فضل الرحمان سے منسلک متعدد مدارس میں بلڈنگ کنٹرول قوانین کی مبینہ خلاف ورزیوں پر نوٹسز جاری کر دیے ہیں۔ نوٹسز میں غیر منظور شدہ تعمیرات اور عمارتوں کے استعمال سے متعلق اعتراضات اٹھائے گئے ہیں۔

مدرسہ اختر العلوم کو تعمیراتی نقشے جمع کرانے کی ہدایت

سی ڈی اے کی جانب سے مدرسہ اختر العلوم، بلال ٹاؤن، کورنگ نالہ، کھنہ ڈاک کو منظور شدہ بلڈنگ پلان کے بغیر تعمیرات کرنے پر نوٹس جاری کیا گیا ہے۔

اتھارٹی نے مدرسے کی انتظامیہ کو 15 روز کے اندر تعمیراتی نقشے جمع کرانے کی ہدایت کرتے ہوئے خبردار کیا ہے کہ عدم تعمیل کی صورت میں عمارت سیل کرنے کی کارروائی کی جا سکتی ہے۔

ایف ایٹ تھری میں بھی مبینہ خلاف ورزیوں کی نشاندہی

سی ڈی اے نے ادارہ معارف اسلامیہ، شریعہ ربانیہ، تفی القرآن، مکان نمبر 3، اسٹریٹ نمبر 6، سیکٹر ایف ایٹ تھری میں بھی مبینہ غیر قانونی تعمیرات کی نشاندہی کی ہے۔

نوٹس کے مطابق عمارت کے سیٹ بیکس پر تعمیرات اور چھت پر غیر مجاز تعمیرات کی گئی ہیں۔ سی ڈی اے نے رہائشی عمارت کو مدرسے کے طور پر استعمال کرنے پر بھی اعتراض اٹھایا ہے۔

خلاف ورزیاں ختم نہ کرنے پر کارروائی کا انتباہ

اتھارٹی نے متعلقہ مدرسے کی انتظامیہ کو تمام نشاندہی شدہ خلاف ورزیاں 15 روز میں ختم کرنے کی ہدایت کی ہے۔ نوٹس میں خبردار کیا گیا ہے کہ مقررہ مدت میں عمل نہ ہونے پر عمارت سیل کرنے، جرمانے عائد کرنے اور الاٹمنٹ منسوخ کرنے کی کارروائی کی جا سکتی ہے۔

سی ڈی اے کی جانب سے یہ اقدامات اسلام آباد میں بلڈنگ کنٹرول قوانین پر عملدرآمد کے سلسلے میں کیے جا رہے ہیں۔