وفاقی دارالحکومت میں 142 کھلے مین ہولز!شہریوں کی حفاظت کیلئے بڑی مہم شروع
ضلعی انتظامیہ نے شہر بھر میں بغیر ڈھکن مین ہولز کا سروے مکمل کر لیا، 142 سے زائد مقامات پر مضبوط ڈھکن نصب کرنے کا عمل جاری، شہری ہیلپ لائن پر شکایات درج کرا سکتے ہیں۔
اسلام آباد: وفاقی دارالحکومت میں کھلے مین ہولز کو محفوظ بنانے کے لیے ضلعی انتظامیہ اسلام آباد نے خصوصی مہم شروع کر دی ہے، جس کے تحت شہر بھر میں بغیر ڈھکن مین ہولز کی نشاندہی کے لیے سروے مکمل کر لیا گیا ہے۔
ضلعی انتظامیہ کے مطابق سروے کے دوران 142 سے زائد کھلے مین ہولز کی نشاندہی ہوئی ہے، جن پر ڈھکن نصب کرنے کا عمل جاری ہے۔
شہریوں کی حفاظت مہم کا بنیادی مقصد
ضلعی انتظامیہ کا کہنا ہے کہ کھلے مین ہولز کو ڈھانپنے کا مقصد ممکنہ حادثات کی روک تھام اور شہریوں کی محفوظ آمدورفت یقینی بنانا ہے۔
مہم میں بالخصوص بچوں اور پیدل چلنے والوں کی حفاظت کو ترجیح دی جا رہی ہے، جبکہ مین ہولز پر معیاری اور مضبوط ڈھکن نصب کرنے کی ہدایات بھی جاری کی گئی ہیں۔
شہریوں سے تعاون کی اپیل
ضلعی انتظامیہ نے شہریوں سے اپیل کی ہے کہ وہ اپنے علاقوں میں کھلے یا غیر محفوظ مین ہولز کی نشاندہی کرکے انتظامیہ کو آگاہ کریں تاکہ بروقت حفاظتی اقدامات کیے جا سکیں۔
شہری غیر محفوظ مین ہولز کی اطلاع ضلعی انتظامیہ اسلام آباد کی ہیلپ لائن 051-9108084 پر دے سکتے ہیں۔
