اکتوبر میں بجلی چوروں کے خلاف آئیسکو کا بڑا کریک ڈاؤن، 161 افراد پکڑے گئے، 1 کروڑ 94 لاکھ سے زائد جرمانے
اکتوبر 2026 کے دوران 67 ہزار 173 بجلی میٹرز کی جانچ پڑتال کی گئی، 142 غیرقانونی کنکشنز، 12 میٹر ٹیمپرنگ اور 7 میٹر ڈرلنگ کے کیسز سامنے آئے۔
اسلام آباد: اسلام آباد الیکٹرک سپلائی کمپنی (آئیسکو) نے بجلی چوری کے خلاف کارروائیوں کے دوران اکتوبر 2026 میں 161 افراد کو پکڑ لیا، جبکہ بجلی چوری میں ملوث عناصر پر مجموعی طور پر 1 کروڑ 94 لاکھ روپے سے زائد کے جرمانے عائد کیے گئے۔
آئیسکو کی جانب سے جاری کردہ اعدادوشمار کے مطابق ایک ماہ کے دوران بجلی چوری کی روک تھام کے لیے 67 ہزار 173 بجلی میٹرز کی جانچ پڑتال کی گئی، جس کے نتیجے میں مختلف نوعیت کی بے ضابطگیوں اور غیرقانونی سرگرمیوں کا انکشاف ہوا۔
غیرقانونی کنکشنز اور میٹر ٹیمپرنگ کے کیسز سامنے آگئے
آئیسکو کے مطابق کارروائیوں کے دوران 142 افراد براہ راست غیرقانونی کنکشن کے ذریعے بجلی استعمال کرتے ہوئے پکڑے گئے، جبکہ 12 میٹرز میں ٹیمپرنگ اور 7 میٹرز میں ڈرلنگ کے ذریعے مبینہ چھیڑ چھاڑ کی نشاندہی کی گئی۔
بجلی چوری میں ملوث عناصر کے خلاف قانونی کارروائی کے لیے درخواستیں جمع کرائی گئیں، جبکہ متعدد میٹرز اور ٹرانسفارمرز بھی منقطع کیے گئے۔
بجلی چوری کے خلاف زیرو ٹالرنس پالیسی
چیف ایگزیکٹو آئیسکو انجینئر چوہدری خالد محمود نے کہا ہے کہ بجلی چوری محض ایک غیرقانونی عمل نہیں بلکہ قومی معیشت اور ایمانداری سے بجلی کے بل ادا کرنے والے صارفین کے حقوق کو نقصان پہنچانے کے مترادف ہے۔
انہوں نے واضح کیا کہ آئیسکو بجلی چوری میں ملوث عناصر کے خلاف سخت کارروائیاں جاری رکھے ہوئے ہے اور اس معاملے میں کسی قسم کی رعایت نہیں دی جائے گی۔
چوہدری خالد محمود نے صارفین سے اپیل کی کہ وہ بجلی چوری کی نشاندہی کرکے قومی مہم میں ادارے کا ساتھ دیں۔ شہری اپنے متعلقہ سب ڈویژنل آفیسر (SDO) کو اطلاع دے سکتے ہیں یا آئیسکو کی ہیلپ لائن 118 پر رابطہ کر سکتے ہیں۔
آئیسکو انتظامیہ کے مطابق بجلی چوری کی روک تھام کے لیے عوامی تعاون نہایت اہم ہے، کیونکہ اس سے بجلی کے نظام میں بہتری اور قانونی صارفین کے حقوق کے تحفظ میں مدد مل سکتی ہے۔
