اسلام آباد کے بلدیاتی انتخابات پھر قانونی تنازع کا شکار، انتخابی شیڈول معطل

اسلام آباد: اسلام آباد ہائیکورٹ نے وفاقی دارالحکومت میں بلدیاتی انتخابات سے متعلق الیکشن کمیشن کا 21 اکتوبر 2026 کا حکم نامہ اور انتخابی شیڈول معطل کر دیا۔ عدالت نے چوہدری امجد علی کی جانب سے دائر درخواست پر الیکشن کمیشن سمیت دیگر فریقین کو نوٹس جاری کرتے ہوئے 26 نومبر 2026 تک جواب جمع کرانے کی ہدایت کردی۔

عدالت نے فریقین کو آئندہ سماعت تک رپورٹ اور پیرا وائز کمنٹس جمع کرانے کا حکم دیا ہے۔

بلدیاتی قانون میں تبدیلی اور یونین کونسلوں کی تعداد کا معاملہ

عدالت کے تحریری حکم نامے کے مطابق درخواست گزار کا مؤقف ہے کہ اسلام آباد کا اصل لوکل گورنمنٹ ایکٹ 2015 کے تحت ایک میٹروپولیٹن کارپوریشن اور 125 یونین کونسلوں پر مشتمل تھا، جبکہ ہر یونین کونسل کو قانون کے تحت نو وارڈز میں تقسیم کیا گیا تھا۔

حکم نامے کے مطابق الیکشن کمیشن نے 12 دسمبر 2024 کو حلقہ بندیوں کا شیڈول جاری کیا اور حلقہ بندیوں کی تکمیل کے بعد 26 دسمبر 2025 کو انتخابی پروگرام جاری کیا، تاہم بعد ازاں یہ پروگرام واپس لے لیا گیا۔

بعد ازاں اسلام آباد کیپیٹل ٹیریٹری لوکل گورنمنٹ آرڈیننس 2026 کے نفاذ سے تین ٹاؤن کارپوریشنز قائم کی گئیں اور یونین کونسلوں کی تعداد 125 سے بڑھا کر 130 کردی گئی۔

آرڈیننس کے تحت یونین کونسلوں کے نو وارڈز کی سابقہ ساخت ختم کرکے مردم شماری بلاکس کی بنیاد پر نئی حلقہ بندیوں کا طریقہ کار متعارف کرایا گیا۔

آرڈیننس غیر مؤثر ہونے کے بعد انتخابی شیڈول پر اعتراض

عدالت کے مطابق الیکشن کمیشن نے 25 اگست 2026 کو نظرثانی شدہ حلقہ بندیوں کا شیڈول جاری کیا اور 14 اکتوبر 2026 کو 130 یونین کونسلوں کی حتمی فہرست بھی جاری کردی۔

تحریری حکم نامے میں بتایا گیا کہ 120 روز کی توسیع کے بعد لوکل گورنمنٹ آرڈیننس 2026 آئین کے آرٹیکل 89 کے تحت غیر مؤثر ہوگیا اور اس کے نتیجے میں لوکل گورنمنٹ ایکٹ 2015 بحال ہوگیا۔

اس کے بعد الیکشن کمیشن نے 21 اکتوبر 2026 کے حکم نامے کے تحت بحال شدہ قانون کے مطابق انتخابات کرانے کا فیصلہ کرتے ہوئے اسی روز انتخابی شیڈول جاری کردیا۔

درخواست گزار کے قانونی اعتراضات

درخواست گزار کے مطابق الیکشن کمیشن کے 21 اکتوبر کے حکم نامے میں بحال شدہ لوکل گورنمنٹ ایکٹ 2015 کے تحت 125 یونین کونسلوں کے نو وارڈز یا میٹروپولیٹن کارپوریشن کی نئی حلقہ بندیوں سے متعلق کوئی فیصلہ نہیں کیا گیا۔

درخواست گزار نے مؤقف اختیار کیا کہ 2026 کے ترمیم شدہ قانون کے تحت کی گئی حلقہ بندیاں بحال شدہ 2015 کے قانون کے تحت انتخابات کی بنیاد نہیں بن سکتیں۔

درخواست کے مطابق بلدیاتی انتخابات کے انعقاد سے قبل لوکل گورنمنٹ ایکٹ 2015 اور الیکشنز ایکٹ کے مطابق نئی حلقہ بندیوں اور ووٹر لسٹوں کی تیاری ضروری ہے۔

درخواست گزار کا مزید کہنا تھا کہ مطلوبہ حلقہ بندیوں کے بغیر انتخابات کا انعقاد آئین کے آرٹیکل 218(3)، لوکل گورنمنٹ ایکٹ 2015 اور الیکشنز ایکٹ کی خلاف ورزی ہوگا، جبکہ اس سے سرکاری فنڈز کا بھی ضیاع ہوگا۔

اسلام آباد ہائیکورٹ نے الیکشن کمیشن اور دیگر فریقین کو نوٹس جاری کرتے ہوئے 26 نومبر 2026 تک رپورٹ اور پیرا وائز کمنٹس جمع کرانے کی ہدایت کی اور کیس کی مزید سماعت ملتوی کردی۔