برطانیہ ورک ویزا کا جھانسہ، جعلی آئیلٹس سرٹیفکیٹ اور نکاح نامہ دینے والی ملزمہ گرفتار

اسلام آباد: ایف آئی اے اینٹی ہیومن ٹریفکنگ سرکل راولپنڈی نے برطانیہ ورک ویزا فراڈ کے مقدمے میں کارروائی کرتے ہوئے مبینہ طور پر 52 لاکھ روپے ہتھیانے والی ملزمہ کو گرفتار کر لیا ہے۔

ایف آئی اے کے مطابق مقدمہ نمبر 285/2026 میں شکایت کنندہ نے الزام عائد کیا کہ ملزمہ نے انہیں برطانیہ بھجوانے کا جھانسہ دے کر مختلف اوقات میں مجموعی طور پر 52 لاکھ روپے وصول کیے۔

ابتدائی تفتیش کے مطابق ملزمہ نے 10 لاکھ روپے کے عوض شکایت کنندہ کو جعلی آئیلٹس سرٹیفکیٹ فراہم کیا۔ بعد ازاں شادی کے ذریعے یو کے ویزا دلوانے کا وعدہ کرتے ہوئے جعلی نکاح رجسٹریشن سرٹیفکیٹ اور ای اسٹامپ پیپر پر معاہدہ بھی فراہم کیا گیا، جبکہ ایک دوسرے ملزم نے معاہدے میں ضامن کا کردار ادا کیا۔

ایف آئی اے کے مطابق جب شکایت کنندہ نے اپنی رقم واپس طلب کی تو ملزمان نے مبینہ طور پر رقم واپس کرنے سے انکار کیا اور دھمکیاں دیں۔

20 لاکھ روپے کی جزوی ریکوری

تفتیش کے دوران گرفتار ملزمہ سے 20 لاکھ روپے کی جزوی ریکوری کر لی گئی ہے، جبکہ باقی رقم کی برآمدگی اور دیگر ملوث افراد کے کردار کا تعین کرنے کے لیے تحقیقات جاری ہیں۔

مقدمے کی تفتیش انسپکٹر اقرا جہانگیر کر رہی ہیں۔

ایف آئی اے اسلام آباد زون کے مطابق انسانی اسمگلنگ اور ویزا فراڈ میں ملوث عناصر کے خلاف قانونی کارروائیاں جاری رکھی جائیں گی۔