شہریوں کی جیبوں پر مبینہ ڈاکا؟ پیٹرول مشینوں میں الیکٹرانک ڈیوائسز ملنے پر نوٹس

اسلام آباد: وفاقی دارالحکومت میں پیٹرول کی پیمائش میں مبینہ ردوبدل کے لیے فیول ڈسپنسنگ مشینوں میں الیکٹرانک ڈیوائسز نصب کرنے کا معاملہ سامنے آنے پر ضلعی انتظامیہ نے تین فلنگ اسٹیشنز کے مالکان کو شوکاز نوٹس جاری کردیے ہیں۔

ضلعی انتظامیہ اسلام آباد کے مطابق لہتراڑ روڈ پر واقع تین فلنگ اسٹیشنز کے خلاف اسسٹنٹ کمشنر نیلور کی انسپکشن رپورٹ کی بنیاد پر کارروائی شروع کی گئی ہے۔ انسپکشن کے دوران متعلقہ پیٹرول پمپس کی فیول ڈسپنسنگ مشینوں میں مبینہ طور پر الیکٹرانک ڈیوائسز نصب پائی گئیں، جن کے ذریعے فیول کی پیمائش میں ردوبدل کیے جانے کا شبہ ظاہر کیا گیا ہے۔

فیول مشینیں سیل، ڈیوائسز تکنیکی معائنے کے لیے محفوظ

شوکاز نوٹسز کے مطابق مبینہ طور پر مشکوک الیکٹرانک ڈیوائسز کی موجودگی کے بعد متعلقہ فیول ڈسپنسنگ مشینوں کو سیل کردیا گیا، جبکہ برآمد ہونے والی ڈیوائسز کو تکنیکی معائنے کے لیے محفوظ کرلیا گیا ہے۔

انتظامیہ نے نوٹسز میں مؤقف اختیار کیا ہے کہ اگر مشینوں پر ظاہر کردہ مقدار سے کم فیول صارفین کو فراہم کیا جارہا تھا تو اس سے شہریوں کو مالی نقصان پہنچ سکتا ہے، جو ایک سنگین معاملہ ہے۔

سات روز میں تحریری جواب اور دستاویزات طلب

ضلعی انتظامیہ نے متعلقہ فلنگ اسٹیشنز کی انتظامیہ کو شوکاز نوٹس موصول ہونے کے سات روز کے اندر تحریری جواب جمع کرانے کی ہدایت کی ہے۔ نوٹسز میں وضاحت طلب کی گئی ہے کہ مبینہ خلاف ورزیوں کی بنیاد پر ان کے این او سی منسوخ کیوں نہ کیے جائیں اور مالکان یا انتظامیہ کے خلاف قانونی و انتظامی کارروائی کیوں شروع نہ کی جائے۔

متعلقہ مالکان کو تحریری جواب کے ساتھ این او سی، متعلقہ لائسنس، فارم ’’K‘‘ سرٹیفکیٹس اور فیول مشینوں کے معائنے و دیکھ بھال کا ریکارڈ بھی جمع کرانے کی ہدایت کی گئی ہے۔ اس کے علاوہ اپنے دفاع میں دیگر متعلقہ دستاویزی شواہد پیش کرنے کا بھی کہا گیا ہے۔

18 نومبر کو ذاتی سماعت، عدم پیشی پر یک طرفہ کارروائی کا انتباہ

شوکاز نوٹسز میں فلنگ اسٹیشنز کی انتظامیہ کو 18 نومبر 2026 کو صبح 10 بجے ذاتی سماعت کا موقع بھی فراہم کیا گیا ہے۔ متعلقہ مالکان خود یا اپنے مجاز نمائندوں کے ذریعے ضروری دستاویزات کے ساتھ پیش ہوسکتے ہیں۔

ضلعی انتظامیہ نے خبردار کیا ہے کہ مقررہ مدت میں تحریری جواب جمع نہ کرانے یا سماعت کے موقع پر حاضر نہ ہونے کی صورت میں دستیاب ریکارڈ کی بنیاد پر یک طرفہ کارروائی کی جاسکتی ہے۔

نوٹسز کے مطابق اگر تحقیقات میں الزامات ثابت ہوگئے تو متعلقہ قوانین اور مقررہ طریقۂ کار کے تحت فلنگ اسٹیشنز کے این او سی منسوخ کرنے سمیت دیگر قانونی و انتظامی اقدامات بھی کیے جاسکتے ہیں۔

ضلعی انتظامیہ اسلام آباد نے واضح کیا ہے کہ معاملے میں متعلقہ فلنگ اسٹیشنز سے وضاحت طلب کرلی گئی ہے اور حتمی کارروائی جواب، دستاویزی شواہد اور دستیاب ریکارڈ کا جائزہ لینے کے بعد عمل میں لائی جائے گی۔