اسلام آباد میں اب کیش نہیں چلے گا؟ حکومت نے ڈیجیٹل ادائیگیوں کیلئے ڈیڈ لائن مقرر کردی

اسلام آباد: وفاقی حکومت نے اسلام آباد کو پاکستان کا پہلا مکمل کیش لیس شہر بنانے کے لیے ڈیجیٹل ادائیگیوں کے نظام پر منتقلی کی ڈیڈ لائن مقرر کردی ہے۔ 30 نومبر کے بعد اسلام آباد کیپیٹل ٹیریٹری (آئی سی ٹی) اور کیپیٹل ڈیولپمنٹ اتھارٹی (سی ڈی اے) کے کسی بھی محکمے میں نقد ادائیگیاں وصول نہیں کی جائیں گی، جبکہ 31 دسمبر تک شہر کے تمام کاروباری مراکز کو کیش لیس نظام سے منسلک کرنے کا ہدف مقرر کیا گیا ہے۔

وزیر مملکت برائے داخلہ طلال چوہدری کی زیر صدارت کیش لیس اسلام آباد منصوبے پر عملدرآمد کے حوالے سے اہم اجلاس منعقد ہوا، جس میں چیئرمین سی ڈی اے سہیل اشرف، بینکنگ سیکٹر کے نمائندگان اور دیگر اعلیٰ حکام نے شرکت کی۔

اجلاس میں منصوبے پر پیش رفت، ڈیجیٹل ادائیگیوں کے فروغ اور شہر بھر میں نقد لین دین کے متبادل نظام کو وسعت دینے سے متعلق امور کا جائزہ لیا گیا۔

30 نومبر کے بعد سرکاری محکموں میں نقد ادائیگیاں بند

طلال چوہدری نے اجلاس کو بتایا کہ وزیراعظم اور وزیر داخلہ کی ہدایات پر کیش لیس اسلام آباد منصوبے پر تیزی سے عملدرآمد جاری ہے۔

انہوں نے کہا کہ 30 نومبر کے بعد آئی سی ٹی اور سی ڈی اے کے کسی بھی محکمے میں نقد ادائیگی وصول نہیں کی جائے گی، جبکہ 31 دسمبر تک اسلام آباد کے تمام مرچنٹس کو ڈیجیٹل ادائیگیوں کے نظام میں شامل کرنے کا ہدف مقرر کیا گیا ہے۔

وزیر مملکت کے مطابق وزیر داخلہ محسن نقوی نے اسلام آباد کو پاکستان کا پہلا کیش لیس شہر اور دنیا کا پہلا کیش لیس دارالحکومت بنانے کا وعدہ کیا تھا، جس پر عملی اقدامات کیے جا رہے ہیں۔

26 ہزار مرچنٹس پہلے ہی ڈیجیٹل نظام سے منسلک

طلال چوہدری نے بتایا کہ اسلام آباد میں اب تک 26 ہزار مرچنٹس ڈیجیٹل ادائیگیوں کے نظام سے منسلک ہو چکے ہیں۔

ان کا کہنا تھا کہ ریڑھی بانوں سے لے کر بڑے کاروباری مراکز تک ہر سطح پر ڈیجیٹل ادائیگیوں کی سہولت فراہم کی جائے گی تاکہ شہریوں اور تاجروں کو نقد رقم کے بغیر لین دین میں آسانی ہو۔

انہوں نے کہا کہ کیش لیس نظام سے مالیاتی شفافیت، ٹیکس مانیٹرنگ اور لین دین کے نظام میں بہتری آئے گی۔

بینکنگ سیکٹر کی منصوبے کے لیے حمایت

اجلاس میں شریک بینکنگ سیکٹر کے نمائندگان نے کیش لیس اسلام آباد منصوبے کی بھرپور حمایت کرتے ہوئے اس کی کامیابی کے لیے حکومت کو مکمل تعاون کی یقین دہانی کرائی۔

طلال چوہدری نے کہا کہ منصوبے کی کامیابی کے لیے تمام اسٹیک ہولڈرز کی مشاورت اور تجاویز اہم ہیں۔ اسلام آباد کو جدید ڈیجیٹل شہر بنانے کے لیے تمام متعلقہ ادارے مل کر کام کریں گے۔

حکومت کی جانب سے مقرر کردہ اہداف کے مطابق نومبر کے اختتام تک آئی سی ٹی اور سی ڈی اے کے محکموں میں نقد ادائیگیاں بند کرنے اور دسمبر کے اختتام تک شہر کے تمام کاروباری مراکز کو ڈیجیٹل ادائیگیوں کے نظام میں شامل کرنے کی کوشش کی جائے گی۔