پنشنرز اور بیواؤں کے 48 ارب روپے کہاں گئے؟ معاملہ اسلام آباد ہائیکورٹ پہنچ گیا

اسلام آباد: پوسٹل لائف انشورنس کے پنشنرز، بیواؤں اور سرکاری ملازمین کی جمع پونجی کی ادائیگی میں تاخیر اور مبینہ مالی بے ضابطگیوں کا معاملہ اسلام آباد ہائیکورٹ پہنچ گیا۔ عدالت نے وزیراعظم کے سیکرٹری، وزارت مواصلات، وزارت خزانہ، کابینہ ڈویژن سمیت دیگر فریقین کو نوٹس جاری کرتے ہوئے جواب طلب کر لیا ہے۔

جسٹس محمد ارباب طاہر نے پوسٹل لائف انشورنس فنڈز سے متعلق جوڈیشل ایکٹوزم پینل کی درخواست پر سماعت کی۔ درخواست گزار کی جانب سے وکیل اظہر صدیق عدالت میں پیش ہوئے۔

سماعت کے دوران وکیل اظہر صدیق نے مؤقف اختیار کیا کہ پالیسی ہولڈرز کے تقریباً 48 ارب روپے کہاں گئے، اس حوالے سے وفاقی حکومت اور وزارت خزانہ جواب دیں۔ ان کے مطابق وفاقی وزیر مواصلات بھی تسلیم کر چکے ہیں کہ پالیسی ہولڈرز کی رقم وزارت خزانہ کے پاس ہے۔

پالیسی ہولڈرز کی رقم حکومتی آمدن نہیں، درخواست گزار کا مؤقف

درخواست میں مؤقف اختیار کیا گیا ہے کہ پوسٹل لائف انشورنس کے پالیسی ہولڈرز کی رقم وفاقی حکومت کی آمدن نہیں بلکہ ان کی امانت ہے۔ اس سلسلے میں آئین کے آرٹیکل 78 کا حوالہ بھی دیا گیا ہے۔

درخواست گزار نے عدالت سے استدعا کی کہ پوسٹل لائف انشورنس کے فنڈز کی منتقلی، استعمال اور موجودہ مالی حیثیت کی مکمل تفصیلات طلب کی جائیں تاکہ رقم کے استعمال اور ذمہ دار اداروں کا تعین ہو سکے۔

آڈیٹر جنرل کی رپورٹ اور فرانزک آڈٹ کا مطالبہ

وکیل اظہر صدیق نے عدالت کو بتایا کہ آڈیٹر جنرل پاکستان کی خصوصی رپورٹ میں پوسٹل لائف انشورنس کے مالی اور انتظامی معاملات میں بے ضابطگیوں کی نشاندہی کی گئی ہے۔

درخواست میں پالیسی ہولڈرز کے واجب الادا انشورنس کلیمز کی ادائیگی کے لیے آزادانہ فرانزک آڈٹ کرانے کی استدعا بھی کی گئی ہے۔

درخواست گزار کے مطابق انشورنس کلیمز 90 روز کے اندر ادا نہ کرنا انشورنس آرڈیننس 2000 کی دفعہ 118 کے تحت قانونی سوال پیدا کرتا ہے۔

وفاقی وزارتوں اور متعلقہ اداروں کی ذمہ داریوں کے تعین کی استدعا

درخواست میں عدالت سے استدعا کی گئی ہے کہ وزارت خزانہ، وزارت مواصلات، پاکستان پوسٹ اور سیکیورٹیز اینڈ ایکسچینج کمیشن آف پاکستان (ایس ای سی پی) کی ذمہ داریوں کا تعین کیا جائے۔

اس کے علاوہ وفاقی کابینہ کے فیصلوں، فنڈز کی منتقلی سے متعلق احکامات اور ایکچوریل ویلیوایشن ریکارڈ بھی عدالت میں پیش کرنے کی استدعا کی گئی ہے۔

اسلام آباد ہائیکورٹ نے ابتدائی سماعت کے بعد تمام فریقین کو نوٹس جاری کرتے ہوئے جواب طلب کر لیا اور مزید سماعت ملتوی کر دی۔