سابق سینیٹر مشتاق احمد اور ان کی اہلیہ میں علیحدگی؛ فیملی کورٹ نے خلع کی ڈگری جاری کردی

اسلام آباد کی ڈسٹرکٹ اینڈ سیشن کورٹ کی فیملی کورٹ نے سابق سینیٹر مشتاق احمد اور ان کی اہلیہ حمیرا طیبہ کے درمیان نکاح خلع کی بنیاد پر ختم کرنے کا حکم دے دیا۔ عدالت نے حمیرا طیبہ کے حق میں خلع کی ڈگری جاری کر دی۔

فیملی کورٹ کی جج امبرین اقبال نے کیس کی سماعت کے بعد خلع کی ڈگری جاری کی۔ عدالتی فیصلے کے مطابق خاتون اپنے شوہر کے ساتھ مزید ازدواجی زندگی گزارنے پر آمادہ نہیں تھیں جبکہ عدالت میں فریقین کے درمیان مصالحت کی کوششیں بھی ناکام ہو گئیں۔

خاتون نے شوہر کے ساتھ رہنے سے انکار کیا

عدالت کے مطابق حمیرا طیبہ نے اپنے بیانِ حلفی میں شوہر سے نفرت اور ان کے ساتھ رہنے سے انکار کا اظہار کیا۔ مصالحت کی کوششیں ناکام ہونے کے بعد عدالت نے خلع کی بنیاد پر نکاح ختم کرنے کی ڈگری جاری کر دی۔

حق مہر اور دیگر معاملات سے متعلق عدالتی حکم

عدالت کے مطابق حق مہر کے حوالے سے دونوں فریقین کا ایک دوسرے پر کوئی دعویٰ نہیں تھا۔ بچوں کے نان و نفقہ، غیر شادی شدہ بیٹیوں کے اخراجات اور دیگر استدعاؤں سے متعلق باقی دعویٰ واپس لینے پر خارج کر دیا گیا۔

عدالت نے خلع کی ڈگری کی مصدقہ نقل شوہر اور متعلقہ یونین کونسل کو بھجوانے کا بھی حکم دیا ہے۔