جنہوں نے نظام کمزور کیا، وہ خیبرپختونخوا میں امن کیسے لائیں گے؟ راجہ ناصر عباس

اسلام آباد: سینیٹ میں اپوزیشن لیڈر علامہ راجہ ناصر عباس نے کہا ہے کہ ہمارے ملک میں بھی چھوٹے چھوٹے ٹرمپ موجود ہیں، بانی پاکستان تحریک انصاف عمران خان حکمرانوں کے گلے کی ہڈی بن گئے ہیں اور اسی خوف کے باعث پی ٹی آئی کی حکومت گرائی گئی تھی۔

صحافیوں سے گفتگو کرتے ہوئے راجہ ناصر عباس نے الزام عائد کیا کہ سیاسی مخالفین کے خلاف مختلف اقدامات کیے گئے، لوگوں کو اٹھایا گیا اور خواتین کی عزت پامال کی گئی۔ انہوں نے خیبرپختونخوا میں گورنر راج اور ایمرجنسی کے ممکنہ نفاذ پر بھی تشویش کا اظہار کیا۔

خیبرپختونخوا میں امن و امان کی صورتحال پر سوالات

راجہ ناصر عباس نے کہا کہ بلوچستان میں 25 سال سے امن قائم نہیں ہو سکا اور اب خیبرپختونخوا میں بھی بدامنی بڑھ رہی ہے۔ ان کے مطابق صوبے کو دوبارہ آزمائے ہوئے سیاسی لوگوں کے حوالے کیا گیا ہے۔

انہوں نے سوال اٹھایا کہ جن لوگوں نے نظام کو کمزور کیا، کیا وہ خیبرپختونخوا میں امن قائم کر سکیں گے اور دہشت گردی سمیت جرائم کا خاتمہ کر پائیں گے؟

عوامی مینڈیٹ اور حکومتی پالیسیوں پر تنقید

سینیٹ میں اپوزیشن لیڈر نے کہا کہ عوام کا مینڈیٹ چھین کر ان کے فیصلے کو مسترد کیا گیا ہے، جبکہ موجودہ نظام کی سیاسی لڑائی بھی عوام کے ساتھ ہے۔

ان کا کہنا تھا کہ حکومت عوام کی خدمت کرنے کے بجائے ان سے لڑ رہی ہے اور سیاسی، معاشی و طاقت کے استعمال کی لڑائی عوام کے خلاف لڑی جا رہی ہے۔

راجہ ناصر عباس نے مزید کہا کہ موجودہ نظام سیاسی، معاشی اور سماجی طاقت کا غلط استعمال کر رہا ہے، جبکہ پاکستان اندرونی اور بیرونی دونوں سطحوں پر بحرانوں کا شکار ہے۔