سی ڈی اے کا گریڈ 16 اور اس سے اوپر کے افسران سے ذاتی و ملازمتی کوائف طلب کرنے کا فیصلہ

اسلام آباد: کیپیٹل ڈویلپمنٹ اتھارٹی (سی ڈی اے) نے گریڈ 16 اور اس سے اوپر کے تمام افسران سے ذاتی اور ملازمتی کوائف طلب کر لیے ہیں، اس سلسلے میں متعلقہ افسران کو مطلوبہ معلومات اور دستاویزات فراہم کرنے کے لیے تین روز کی مہلت دی گئی ہے۔

ڈائریکٹوریٹ ہیومن ریسورس ڈویلپمنٹ کی جانب سے جاری سرکلر کے مطابق افسران کو ہیومن ریسورس انفارمیشن مینجمنٹ سسٹم (HRMIS) میں ڈیٹا انٹری کے لیے اپنی مکمل تفصیلات فراہم کرنے کی ہدایت کی گئی ہے۔

کن افسران سے کوائف طلب کیے گئے ہیں؟

سرکلر کے مطابق سی ڈی اے کے گریڈ 16 اور اس سے اوپر کے تمام افسران اس ہدایت کے دائرہ کار میں شامل ہیں۔ ان سے شناختی کارڈ، سروس کارڈ، ازدواجی حیثیت، ڈومیسائل، مذہب اور شہریت سے متعلق معلومات طلب کی گئی ہیں۔

اس کے علاوہ افسران کو دوہری شہریت، تاریخِ تقرری اور دیگر ذاتی و ملازمتی کوائف بھی فراہم کرنا ہوں گے۔

تین روز میں معلومات جمع کرانے کی ہدایت

سی ڈی اے انتظامیہ نے تمام متعلقہ افسران کو ہدایت کی ہے کہ مقررہ تین روزہ مدت کے اندر مطلوبہ معلومات کے ساتھ ضروری دستاویزات بھی جمع کروائیں تاکہ HRMIS میں ڈیٹا انٹری کا عمل مکمل کیا جا سکے۔