ایکس اور یوٹیوب پر متنازع مواد ہٹوانا مشکل قومی اسمبلی میں چونکا دینے والے اعدادوشمار

اسلام آباد: وزارت داخلہ نے قومی اسمبلی کے وقفہ سوالات کے دوران سوشل میڈیا کمپنیوں کی جانب سے غیر ضروری اور ریاست مخالف مواد ہٹانے کی درخواستوں پر عمل درآمد، آن لائن خطرات سے نمٹنے کے انتظامات اور نیشنل کاؤنٹر ٹیررازم اتھارٹی (نیکٹا) کے بجٹ سے متعلق تفصیلات پیش کر دیں۔

سوشل میڈیا کمپنیوں کی تعمیل کی شرح

وزارت داخلہ کے مطابق پاکستان ٹیلی کمیونیکیشن اتھارٹی (پی ٹی اے) کی درخواستوں پر سوشل میڈیا کمپنیوں کی مجموعی تعمیل کی شرح 23.7 فیصد ہے، جبکہ انسدادِ دہشت گردی سے متعلق درخواستوں پر یہ شرح 47 فیصد ریکارڈ کی گئی۔

وزارت کی جانب سے پیش کردہ اعداد و شمار کے مطابق مختلف پلیٹ فارمز کی تعمیل کی شرح درج ذیل ہے:

• ایکس: 7.4 فیصد
• یوٹیوب: 1.9 فیصد
• فیس بک: 38.1 فیصد

وزارت داخلہ نے بتایا کہ سوشل میڈیا کمپنیوں نے تاحال پی ٹی اے کے سوشل میڈیا قواعد اختیار نہیں کیے۔

ریاست مخالف مواد سے متعلق درخواستیں

وزارت داخلہ کے مطابق سوشل میڈیا پر ریاست مخالف یا حکومت مخالف مواد کے خلاف سب سے زیادہ درخواستیں پنجاب کی جانب سے کی گئیں، جن کی شرح 97.7 فیصد بتائی گئی۔

وزارت نے مزید بتایا کہ صوبوں اور وفاق کے درمیان آن لائن خطرات سے نمٹنے کے لیے مربوط اور منظم رابطہ کاری کا کوئی نظام موجود نہیں۔ قانون نافذ کرنے والے اداروں اور اوپن سورس انٹیلی جنس سیلز کو تربیت یافتہ تجزیہ کاروں اور چوبیس گھنٹے نگرانی کی سہولت کی کمی کا بھی سامنا ہے۔

نیکٹا کے بجٹ اور فنڈز کی تفصیلات

وزارت داخلہ کے مطابق نیکٹا نے مالی سال 2026-27 کے لیے 2 ارب 98 کروڑ روپے سے زائد فنڈز طلب کیے ہیں، جبکہ رواں سال کے لیے ادارے کو 1 ارب 33 کروڑ روپے سے زائد جاری کیے گئے ہیں۔

نیکٹا کو نیا ڈویژن بنانے کا منصوبہ

وزارت داخلہ نے بتایا کہ نیکٹا انسدادِ دہشت گردی کا قانونی ادارہ ہے، تاہم اسے گرفتاری اور قانون نافذ کرنے کے اختیارات حاصل نہیں ہیں۔

وزارت کے مطابق نیکٹا کو نیشنل کاؤنٹر ٹیررازم ڈویژن میں تبدیل کیا جائے گا تاکہ دہشت گردی اور انتہا پسندی کے خاتمے کے لیے زیادہ مؤثر کردار ادا کیا جا سکے۔