اسلام آباد ہائی کورٹ

عدالتی حکم پر عمل کریں، سچ جھوٹ نہیں سننا، چیف جسٹس سرفراز ڈوگر سی ڈی اے پر برہم

پلاٹ الاٹمنٹ کیس میں عدالتی حکم پر عملدرآمد نہ ہونے پر توہین عدالت کیس کی سماعت، چیف جسٹس سرفراز ڈوگر نے سی ڈی اے کو 15 روز میں عملدرآمد رپورٹ پیش کرنے کی ہدایت کر دی۔

اسلام آباد: اسلام آباد ہائیکورٹ نے پلاٹ الاٹمنٹ کیس میں عدالتی احکامات پر عملدرآمد نہ ہونے پر سی ڈی اے حکام کے خلاف توہین عدالت کیس کی سماعت کرتے ہوئے ادارے کے رویے پر سخت برہمی کا اظہار کیا ہے۔ چیف جسٹس سرفراز ڈوگر نے ریمارکس دیے کہ عدالت کے حکم کے باوجود دوبارہ سماعت کرنے کا کیا جواز ہے؟ عدالت نے سی ڈی اے کو 15 روز میں مرکزی کیس کے حکم پر عملدرآمد کی رپورٹ پیش کرنے کی ہدایت کرتے ہوئے چیئرمین سی ڈی اے کو ذاتی حیثیت میں طلب کرنے کا عندیہ بھی دیا۔

چیف جسٹس سرفراز ڈوگر کے سی ڈی اے حکام پر سخت ریمارکس

چیف جسٹس سرفراز ڈوگر نے ریمارکس دیے کہ جب عدالت کا حکم آچکا تھا تو پھر سماعت کیوں کی جا رہی ہے؟ ہم ایک معاملے کو نظر انداز کرتے ہیں تو آپ کا کوئی دوسرا مسئلہ سامنے آجاتا ہے۔ اسی طرح آپ عدالتی حکم کی بے توقیری کر رہے ہیں۔

سی ڈی اے کے وکیل نے عدالت کو بتایا کہ متعلقہ حکم ادارے کے ڈپٹی کمشنر کی جانب سے جاری کیا گیا ہے۔ اس پر چیف جسٹس نے سخت ریمارکس دیتے ہوئے کہا کہ جس نے بھی یہ حکم دیا، میری طرف سے اسے پھانسی دے دیں۔

چیف جسٹس سرفراز ڈوگر نے مزید کہا کہ اب انہیں سچ اور جھوٹ نہیں سننا بلکہ عدالتی حکم پر عملدرآمد چاہیے۔ عدالت کی معاونت کرنے کی ضرورت نہیں، عدالتی حکم پر عمل کریں اور خود آرڈر سمیت دستاویزات کی تصدیق کیا کریں۔

سی ڈی اے کو 15 روز کی مہلت

دوران سماعت درخواست گزار کے وکیل حسنین حیدر تھہیم نے مؤقف اختیار کیا کہ کیس پہلے ہی عدالت میں زیر التوا ہے، لیکن سی ڈی اے نے انہیں ذاتی سماعت کے لیے طلب کر رکھا ہے۔ وکیل درخواست گزار نے بتایا کہ 15 جون کا عدالتی حکم ایک ماہ تک نافذ نہیں کیا گیا، جس کے بعد توہین عدالت کی درخواست دائر کی گئی۔

وکیل نے مزید کہا کہ سی ڈی اے کا رویہ تیسری مرتبہ بھی پہلے جیسا ہی ہے۔ عدالت نے ہدایت کی کہ 15 روز کے اندر مرکزی کیس میں عدالتی حکم پر عملدرآمد یقینی بنا کر رپورٹ پیش کی جائے۔

ممبر اسٹیٹ سی ڈی اے کا بیان حلفی جمع

سماعت کے دوران عدالت میں غلط بیانی کے معاملے پر ممبر اسٹیٹ سی ڈی اے زمان وٹو کی جانب سے بیان حلفی بھی جمع کرایا گیا۔ زمان وٹو اپنے وکیل کاشف ملک کے ہمراہ عدالت میں پیش ہوئے۔

چیف جسٹس سرفراز ڈوگر نے ریمارکس دیے کہ ممبر اسٹیٹ کے خلاف توہین عدالت کے معاملے کو بعد میں دیکھیں گے، پہلے مرکزی کیس کو دیکھا جائے گا۔

اسلام آباد ہائیکورٹ نے سی ڈی اے کو 15 روز میں عدالتی حکم پر عملدرآمد کی ہدایت کرتے ہوئے سماعت ملتوی کردی۔

Tribune Desk

اسلام آباد ٹریبیون ایک مستند ڈیجیٹل نیوز پلیٹ فارم ہے جو اسلام آباد میں تازہ ترین خبروں، حکومتی امور، عوامی مسائل، کاروبار، تعلیم، امن و امان اور سماجی و عوامی سرگرمیوں کی کوریج کرتا ہے۔ ہمارا مقصد درست، ذمہ دارانہ اور مؤثر صحافت کے ذریعے شہریوں تک قابلِ اعتماد معلومات پہنچانا اور پاکستان کے دارالحکومت کو درپیش اہم معاملات سے باخبر رکھنا ہے۔ اسلام آباد ٹریبیون — اسلام آباد کو باخبر رکھنا ہمارا عزم۔

Related Articles

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button