کرکٹ ٹیموں کی نقل و حرکت، ایکسپریس اور سری نگر ہائی وے پر 20 سے 25 منٹ پہلے نکلیں

اسلام آباد: کرکٹ ٹیموں کی آمدورفت کے سلسلے میں وفاقی دارالحکومت کی اہم شاہراہوں، خصوصاً ایکسپریس ہائی وے اور سری نگر ہائی وے پر مختلف مقامات پر ٹریفک ڈائیورشنز نافذ کی جائیں گی۔

ٹریفک پلان کے مطابق سری نگر ہائی وے پر سرینہ چوک سے نائنتھ ایونیو تک مختلف مقامات پر ٹریفک کو متبادل راستوں پر منتقل کیا جائے گا۔ اس دوران سری نگر ہائی وے کی ٹریفک سہروردی روڈ، جی ایٹ اور جی نائن کی سروس روڈز اور زیرو پوائنٹ استعمال کر سکے گی۔

فیض آباد جانے والے شہریوں کو فیصل ایونیو جبکہ نائنتھ ایونیو کی جانب جانے والی ٹریفک کو سروس روڈ ایسٹ استعمال کرنے کی ہدایت کی گئی ہے۔

اسلام آباد آنے اور جانے کے متبادل راستے

کورال سے اسلام آباد آنے والے شہری پرانا ایئرپورٹ، راول روڈ، مری روڈ، آئی جے پی روڈ اور فقیر ایپی روڈ استعمال کریں۔ کورال ایکسپریس وے، مری روڈ اور کلب روڈ بند ہونے کی صورت میں لہتراڑ روڈ اور پارک روڈ متبادل راستے ہوں گے۔

اسی طرح اسلام آباد سے باہر جانے والے شہری جناح ایونیو اور مارگلہ روڈ استعمال کر سکیں گے، جبکہ بہارہ کہو سے اسلام آباد آنے والوں کو بنی گالا اور پارک روڈ کا راستہ اختیار کرنے کی ہدایت کی گئی ہے۔

شہریوں کے لیے ٹریفک ایڈوائزری

ٹریفک ڈائیورشنز کے دوران مختلف شاہراہوں پر ٹریفک کا دباؤ بڑھنے کا امکان ہے۔ شہریوں کو ہدایت کی گئی ہے کہ دوران سفر متبادل راستے اختیار کریں اور اپنی منزل تک پہنچنے کے لیے معمول سے 20 سے 25 منٹ اضافی وقت لے کر گھروں سے نکلیں۔